Мулкдорлар учун қулайлик: Техникани рўйхатдан ўтказишдаги барча тўсиқлар олиб ташланди
Ўзбекистон Республикаси Вазирлар Маҳкамасининг 2019 йил 17 мартдаги 325-сон қарори ижроси юзасидан юридик ва жисмоний шахслар ўртасида олиб борилган тарғибот ва ташвиқот ишлари ва тушунтиришлар натижасида Инспекциянинг вилоят бошқармаси томонидан шу йилнинг 17 март кунидан шу кунга қадар 2250 та қишлоқ хўжалиги, мелиорация ва йўл-қурилиш техникалари ҳамда тиркамалар Инспекция органларида рўйхатдан ўтказилди. Улардан 2250 тасига техник паспорт, 2186 та давлат рақам белгиси, 357 тасига қишлоқ хўжалик машинаси гувоҳномаси берилди. Бундан ташқари, 1816 нафар шахсларга тракторчи-машинист гувоҳномаси берилди.
Норин тумани Тошкент муқобил машина трактор парки ҳудудида фаолият олиб бораётган “Фозилжон қизи Зулхумор” фермер хўжалиги раҳбари Зоҳиджон Одилов инспекция фаолияти тўғрисида шундай фикрларини ўртоқлашди:
“- Фермер хўжалиги фаолиятини 2006 йилдан йўлга қўйганман. 210 гектар майдонда пахта, ғалла ва бошқа қишлоқ хўжалик экинларини етиштириб келмоқдаман. Менинг ҳисобимда 15 та турли хилдаги қишлоқ хўжалиги техникалари бўлиб, уларни фермер хўжалиги номига расмийлаштириш бўйича тегишли тартиб қоидалардан етарлича хабардор эмаслигим сабабли рўйхатдан ўтказмасдан фойдаланиб келаётган эдим. Инспекциянинг Норин туман бўлими ходимлари томонидан менга техникаларни расмийлаштириш юзасидан қонунчиликдаги янгиликлар юзасидан тушунтириш ва маслаҳатлар бериб амалий ёрдам кўрсатилди. Натижада мен техникаларимни инспекцияда рўйхатдан ўтказиб, фермер хўжалигим номига расмийлаштириб, қонуний эгалигим таъминланди. Энди мен, техникаларимдан мулк эгаси сифатида фойдаланиш, хизмат кўрсатиш ва кредит маблағларига эҳтиёж туғилганда гаровга қўйиш каби қонуний имкониятларга эга бўлдим.”
2019 йил 15 мартда Ўзбекистон Республикаси Президентининг “Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси фаолиятини ташкил этиш тўғрисида”ги ПҚ-4241-сон қарори эълон қилинди.
Қарорда "Техника ва агротехник тадбирларни назорат қилиш бўлими"га қишлоқ хўжалиги, мелиорация ва йўл-қурилиш техникаларининг техник ҳолати, уларнинг эксплуатация қилиниши самарадорлиги, шунингдек, сервис ва таъмирлаш хизматларининг сифати устидан назоратни амалга ошириш вазифаси юклатилган.
Мазкур қарорга мувофиқ, қишлоқ хўжалиги, мелиорация ва йўл-қурилиш техникалари ҳамда агротехника тадбирлари ҳолатининг назоратини самарали ташкил этиш мақсадида, Вазирлар Маҳкамасининг 2019 йил 17 мартда “Қишлоқ хўжалиги, мелиорация ва йўл қурилиш техникаларидан фойдаланишни такомиллаштириш чора-тадбирлари тўғрисида”ги 325-сон қарори қабул қилинди.
Шунингдек, қарорда 2019 йил 1 декабрдан бошлаб Тошкент шаҳрида, 2020 йил 1 мартдан бошлаб республика бўйича - тегишли равишда тракторчи-машинист гувоҳномасини расмийлаштиришда - тракторчи-машинист гувоҳномасининг, техникаларни рўйхатдан ўтказишда (қайта рўйхатдан ўтказишда) - техник паспорт ва техник гувоҳноманинг янги намуналари берилиши;
2020 йил 1 март — 2020 йил 31 декабрь даврида эски намунадаги техник паспорт ва техник гувоҳнома, тракторчи-машинист гувоҳномаси, уларнинг берилган санасидан қатъи назар, эгаларининг аризасига кўра, мажбурий техник кўрикдан ўтказишда, олди-сотди, рўйхатдан ўтказиш ва чиқариш даврида алмаштирилиши;
2021 йил 1 январь — 2022 йил 31 декабрь даврида эски намунадаги барча техник паспорт ва техник гувоҳнома, тракторчи-машинист гувоҳномаси, уларнинг берилган санасидан қатъи назар, мажбурий тартибда алмаштирилиши;
эски намунадаги техник паспорт ва техник гувоҳнома, давлат рақами белгилари, тракторчи-машинист гувоҳномаси 2023 йил 1 январдан бошлаб ҳақиқий эмас деб ҳисобланиши;
мазкур қарор билан тасдиқланган тўлов ставкалари 2019 йил 1 июлдан бошлаб кучга кириши белгилаб қўйилди.
Ўзбекистон Ҳукуматининг 2019 йил 12 июлдаги “Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси фаолиятини тартибга солувчи норматив-ҳуқуқий хужжатларни тасдиклаш тўғрисида”ги 575-сонли қарори билан Инспекциянинг Низоми тасдиқланиб унда, Инспекциянинг асосий вазифалари, функциялари, ҳуқуқлари ва мажбуриятларини, шунингдек, фаолиятини ташкил этиш тартиби белгилаб берилди.
Ҳурматли мулкдорлар, ҳисобингиздаги барча қишлоқ хўжалик техника ва машиналарини, асбоб-ускуналарни, Инспекциядан рўйхат, қайта рўйхатдан ва техник кўрикдан ўтказишингизни сўраймиз. Сизлар учун яна бир янгилик: Вазирлар Маҳкамасининг 325-сонли қарорининг 2-иловасига мувофиқ эгалик ҳуқуқи берилмаган яъни оддий ҳалқ тили билан айтганда “Ҳужжатсиз техникалар”ни энди инспекциядан вақтинча рўйхатдан ўтказиш ва уларга техник хужжат, давлат рақам белгиси шунингдек, қишлоқ хўжалик машинаси гувоҳномаси берилиши йўлга қўйилди.
Техникаларни рўйхатдан ўтказмаслик Сизлар учун қуйидаги салбий оқибатларни келтириб чиқаради:
- Техникаларни белгиланган тартибда рўйхатдан ўтказмаслик - бу техникага нисбатан эгалик ҳуқуқингиз йўқлигини билдиради.
- Рўйхатдан ўтмаган техника давлат рақам белгиси ва техник ҳужжат берилмайди.
- Рўйхатдан ўтмаган техникалар техник кўрикдан ўтказилмайди, кафолат даврида турувчи техникалар рўйхатига киритилмайди, кафолат даврида носозликларни аниқлашда инспекция ходими иштирок этмайди ва ҳулоса берилмайди;
- Рўйхатдан ўтказилмаган, давлат рақам белгиси ва техник хужжати мавжуд бўлмаган техникалар суғурта қилинмайди, юридик ва жисмоний шахсларга хизмат кўрсатиш учун рухсатнома (лицензия) берилмайди.
- Рўйхатдан ўтмаган техника ўғирлатилганда унга нисбатан қидирув ишлари олиб борилмайди, техноген офат натижасида техникага етказилган зарар юзасидан хулоса берилмайди.
- Тендер танловларида иштирок этишда, банкдан кредит олишда ёки бошқа ҳолатларда техникангизни гаровга қўйишда маълумотнома берилмайди.
- Белгиланган тартибда Инспекциядан рўйхатдан ўтмаслик, улардан фойдаланиш, йўлга чиқариш қонунчиликда белгиланган тартибда жавобгарликга тортишга сабаб бўлади.
Техникадан белгиланган тартибда рўйхатдан ўтказмасдан фойдаланиш маъмурий жавобгарликка тортишга сабаб бўлади. Сиздан техникани белгиланган тартибда Инспекциядан рўйхат техник ҳужжат ва давлат рақам белгисини олиб ундан манфаатларингиз учун қонун доирасида фойдаланишингизни сўраймиз.
Умархон Юнусов,
Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Наманган вилояти бошқармаси Техника холатини ва агротехник тадбирларни назорат қилиш бўлими бош инспектори.
© namangan24.uz
.jpg)
