USNews Logo

Ўзбекистон “Миллий тикланиш” демократик партияси вакили Миродил Абдураҳмонов бугун Ўзбекистон тадбиркорларини қийнаётган муаммолар ҳамон ўз ечимини топмаётганини маълум қилди.

Халқаро пресс-клубнинг пресс-кофе мулоқотида партия вакили тадбиркорлар ер мулкига эгалик қилиш ҳуқуқини ҳимоя қила олмаётгани ҳақидаги фикрини ўзининг яқин танишлари мисолида келтириб ўтди. У “Ўзбекистон тадбиркорлари партияларни ҳар қанча тавқи лаънат қилса арзийди”, дея кескин муносабат билдирди.

Миродил Абдураҳмонов фармон ва қарорлар тадбиркорлар фаолиятини қўллаб-қувватлашга йўналтирилгани, бироқ уларнинг ижроси таъминланмаётганини очиқ тан олишимиз лозимлигини ҳам айтиб ўтди.

Мулоқотда Ўзбекистон Республикаси Олий Мажлиси қонунчилик палатаси, сиёсий партиялар, савдо-саноат палатаси, бизнес омбудсман вакиллари ва тадбиркорлар иштирок этди, дея хабар берди ЎзА.

Эслатиб ўтамиз, Миродил Абдураҳмонов Тадбиркорлар ва ишбилармонлар ҳаракати — Ўзбекистон Либерал демократик партиясининг “XXI аср“ газетасида узоқ йиллар бош муҳаррир лавозимида ҳам фаолият юритган. Айни пайтда эса “Миллий тикланиш“ партияси марказий кенгаши раиси ўринбосари сифатида фаолият юритмоқда.

© namangan24.uz