USNews Logo

Шу кунларда Таиланднинг Паттайя шаҳрида оғир атлетика бўйича катталар ўртасида жаҳон чемпионати баҳслари қизғин давом этмоқда.

Нанкин ўсмирлар Олимпиадаси ва Осиё ўйинлари совриндори, Наманган спорт мактаби тарбияланувчиси Адҳамжон Эргашев вазни 67 килограммгача бўлган спортчилар ўртасида силтаб кўтариш машқи бўйича бронза медалини қўлга киритиб, терма жамоамиз делегациясига илк совринни келтирди.

Янгиқўрғонлик 20 ёшли спортчи даст кўтариш машқини 141 килолик тошга буюртма бериш билан бошлади ва бу маррани осонлик билан забт этди. Иккинчи уринишда эса Адҳамжон 146 килолик тошни ҳам боши узра баланд кўтара олди. Бироқ Эргашевнинг 151 килолик тошни кўтариш йўлидаги уриниши самарасиз чиқди ва у якунда 146 кило натижа билан даст кўтариш машқларини 4-ўрин билан кифояланди. Агар у 151 килолик тошни ўзига бўйсундирганида олтин медалга эга чиқарди.

Силтаб кўтариш машқида эса юртдошимиз аввалига 173 кг, кейин эса 179 ва 182 кг. оғирликдаги тошларни кўтаришга эришди. Бу натижа эса унга бронза медалини тақдим этди.

Шундай қилиб, ҳамюртимиз беллашган икки курашда Хитойлик Лижун Чен умумий 337 кг. натижа билан биринчи, унинг ватандоши Людонг Фен 333 кг. билан иккинчи, 330 килолик тош кўтарган шимолий кореялик Жонг Жу Пак учинчи поғоналарда қайд этилди. 328 кило натижани кўрсатган Адҳамжон Эргашев “кучли тўртлик”ни якунлаб берди. Шундай бўлса-да, Наманган вилояти спорт жамоатчилиги ва кўп сонли мухлислар номидан Адҳамжон Эргашевни жаҳон чемпионати совриндори ва 2020 йили Токиода бўлажак ёзги Олимпия ўйинлари йўлланмаси йўлида қимматли рейтинг очколарига эга бўлгани билан табриклаймиз.

Оқилхон Дадабоев,

© namangan24.uz