USNews Logo

Наманган ихтисослаштирилган санъат мактабида вилоят эндокринология диспансерида Халқаро диабетлар кунига бағишланган тарғибот тадбири ўтказилди. Унда вилоят соғлиқни сақлаш муассасалари масъул ходимлари, қандли диабетга чалинган 14 ёшгача бўлган болалар ва уларнинг ота-оналари ҳамда оммавий ахборот воситалари вакиллари қатнашдилар.

Тадбирда вилоят соғлиқни сақлаш бошқармаси бошлиғининг биринчи ўринбосари Улуғбек Ботиров, вилоят эндкоринология диспансери бош врачи, тиббиёт фанлари доктори Муҳаммаджон Ваққосов сўзга чиқиб, юртимизда, хусусан Наманган вилоятида қандли диабетнинг олдини олиш ва унга қарши кураш борасида амалга оширилаётган чора-тадбирлар, профилактик ишлар ҳақида тўхталдилар.

Қайд этилганидек, 14 ноябрь санаси 1991 йил Халқаро диабет федерацияси ва Бутун дунё соғлиқни сақлаш ташкилоти томонидан “Бутун дунё диабетга қарши кураш куни“ сифатида эътироф этилган. Бу куннинг танланишига 1891 йилда Фредерик Бантинг томонидан инсулин кашф қилингани асос бўлган. 2007 йилдан бери Бутун дунё диабетга қарши кураш куни БМТ раҳбарлиги остида ўтказилиб келинади. Маълумотларга қараганда, ҳозирда сайёрамизнинг 1 миллиард одами қандли диабетга чалинган.

Қандли диабет, яъни “сахир” – чуқур хавотирга соладиган жиддий касаллик эмас. У фақат турмуш тарзининг ўзгариши билан боғлиқдир. Унинг асоратининг олдини олиш учун курашилади. Ҳатто машҳур инсонларни ҳам бу “ширин дард” четлаб ўтмаган. Масалан, Голливуднинг таниқли юлдузи Силвестер Сталоне 6 ёшидан буён ушбу касаллик билан “бирга”дир. Айтмоқчи, тарғибот тадбирига 85 ёшли наманганлик отахоннинг ўзлари юриб келганликлари юқоридаги фикрларга исбот бўла олади.

Маълумот ўрнида, одамнинг ортиқча вазнга эга бўлиши; овқатланиш рационининг бузилиши; кам ҳаракатлилик қандли диабетни келтириб чиқарувчи омиллардан саналади. Диабет 2 хил турга бўлиниб, у чақалоқлардан тортиб 30 ёшгача ҳамда 30 ёшдан юқори бўлган кишиларда учраши мумкин.

Эътироф этиш жоиз, мамлакатимизда қандли диабетнинг олдини олишга қаратилган кенг кўламли амалий саъй-ҳаракатлар натижасида бемор кишиларда ўртача умр кўриш суръати 42 ёшдан 57 ёшгача ўсиши кузатилди.

Президентимиз томонидан шу йил апрель ойида қабул қилинган 2019-2021 йилларда аҳолига кўрсатиладиган эндокринологик хизматларни янада такомиллаштиришга қаратилган қарор натижасида диабетларга бўлган эътибор сифат жиҳатидан янги босқичга кўтарилди.

Хусусан, 18 ёшгача бўлган беморлар инсулин ўрнини босувчи дори воситалари билан бепул тўлиқ қамраб олинади. Шуни алоҳида таъкидлаш жоизки, бугунги кунда вилоят эндокринология диспансери замон талаблари асосида барпо этилган, энг сўнгги русумдаги тиббий жиҳозлар билан таъминланган бинода аҳолига сифатли хизмат кўрсатиб келмоқда. Яқинда ушбу шифо масканида хирургия бўлимини ташкил этилиши эътиборга молик янгилик бўлди. Эндиликда ушбу бўлимда қандли диабетга оид жарроҳлик амалиётларини ўтказиш имконияти вужудга келди.

Тарғибот тадбирига келган болажонлар учун ихтисослаштирилган санъат мактаби томонидан тайёрланган концерт дастури намойиш этилди. Саховатпеша ҳомийларнинг эсдалик совғалари тортиқ қилинди.

Оқилхон Дадабоев,

© namangan24.uz