USNews Logo

Бокс бўйича Ўзбекистон терма жамоаси аъзоси, терма жамоамиз сафида Олимпия ўйинлари, жаҳон ва Осиё чемпионати совриндорлари бўлган Наманган спорт мактаби тарбияланувчиси Муроджон Аҳмадалиев профессионал боксда икки йўналиш (WBA ва IBF) камарини қўлга киритиб, жаҳон бокси тарихидан муносиб жой олди.

Чустлик алп боксчимиз Муроджон Аҳмадалиев Ислом Каримов номидаги Тошкент халқаро аэропортида спорт жамоатчилиги томонидан тантанали равишда кутиб олинди.

Кутиб олиш маросимида Ўзбекистон Республикаси Президенти маслаҳатчиси Абдужаббор Абдувоҳидов, Ўзбекистон Республикаси Бош вазирининг биринчи ўринбосари ва Ўзбекистон бокс федерацияси раиси Очилбай Раматов, Миллий олимпия қўмитаси раиси Рустам Шоабдураҳмонов, Жисмоний тарбия ва спорт вазири Дилмурод Набиев, спортчининг яқинлари, мухлислар ва оммавий ахборот воситалари ходимлари иштирок этдилар.

Кутиб олиш маросимидан сўнг “Олимпия шон-шуҳрати“ музейида боксчимизни тақдирлаш маросими ўтказилди. Унда Ўзбекистон Республикаси Бош вазири Абдулла Арипов сўзга чиқиб, Муроджон Аҳмадалиевнинг ушбу ғалабаси ўзбек спорти учун улкан ютуқ эканлиги, жаҳон боксидаги 42 йиллик рекорд айнан ўзбекистонлик боксчи томонидан такрорлангани муҳим аҳамиятга эга эканлигини эътироф этди.

Тадбирда Президентимиз Шавкат Мирзиёевнинг спортчимизга йўллаган табриги ҳамда унга “Ўзбекистон ифтихори” фахрий унвонини бериш тўғрисидаги фармони ўқиб эшиттирилди. Сўнгра, Бош вазир Абдулла Арипов Президент совғаси сифатида Тошкент шаҳридан 3 хонали уй ва “Трекер“ автомобилининг калитини боксчимизга тантанали тарзда топширди.

- Муроджон ва унинг ота-онасига, устозларига президентимиз Шавкат Миромоновичнинг табригини йўллашга ижозат бергайсиз. Юртбошимиз бундай ғалабадан жуда ҳам хурсанд бўлдилар. Муроджон, сен профессионал боксда саккизинчи жангдаёқ икки йўналиш бўйича чемпионлик камарларини қўлга киритишдек вазифани уддалаган дунёдаги иккинчи боксчи бўлдинг. Бундай ажойиб натижа билан сени табриклайман. Наманганнинг Чустидан етишиб чиққан мана шундай содда ва камтарин инсон уммон ортида Ўзбекистон номини улуғлаб, бутун дунёга ўз ватанига бўлган муҳаббатини изҳор қилди. Бу йил спорт жамоатчилигини яна бир муҳим синов кутиб турганини яхши биламиз. Ишонаманки, Муроджоннинг мана шундай ғалабаси қолган спортчиларимизга яқинлашиб келаётган Токио Олимпиадасида янада куч-ғайрат бағишлайди, – деди Абдулла Арипов.

Маълумот ўрнида, Муроджон Аҳмадалиев шу йил 31 январь куни АҚШнинг Майами шаҳрида бўлиб ўтган муҳим жангда чемпионлик жангида америкалик Даниэл Романга қарши рингга чиқиб, 12 раундлик шиддатли баҳсда ғолиб деб топилди ва Ўзбекистон тарихида илк марта бир йўла иккита чемпионлик камарини қўлга киритди.

Шуни алоҳида қайд этиш жоизки, Муроджон профессионал фаолиятидаги 8та жангида 8та ғалабага эришиб, бу борада тарихий рекордни такрорлади. Бунга қадар эса фақат Леон Спинкс 8та жангдаёқ чемпионлик камарига эга чиққан эди. Демак, Чустнинг Сероб маҳалласидан етишиб чиққан алпқомат Муроджон дунё бокси тарихида “Аср ғалабаси” (Бундан 42 йил аввал Леон Спинксни афсонавий рақиби Муҳаммад Алини енган жанг) натижасини сўнгги 50 йил ичида такрорлай олган боксчи сифатида эътироф этиладиган бўлди.

© namangan24.uz