Корея Республикаси Президенти Мун Чже Ин коронавирусга қарши “AstraZeneca” компаниясининг вакцинаси билан эмланди. Бу ҳақида давлат раҳбари маъмуриятига асосланиб “Газата.ру”да хабар берилган.

Хабар қилинишича, Жанубий Корея раҳбари билан бирга унинг рафиқаси ва Ҳукуматнинг тўққиз аъзоси коронавирусга қарши вакцина қабул қилган.

Эмлаш жараёни Президент қароргоҳи яқинида жойлашган Сеул марказидаги туман поликлиникасида амалга оширилган.

Қайд этилишича, Мун Чже Ин жорий йил 11-13 июнь кунлари Буюк Британияда бўлиб ўтадиган Г7 саммитига боришга тайёргарлик доирасида коронавирусга қарши эмланган.

Маълумот ўрнида, 2021 йилнинг 18 март куни Грузия Президенти Саломе Зурабишвили ҳам коронавирусга қарши “AstraZeneca” вакцинаси билан эмланганди.

Эслатиб ўтамиз, Ўзбекистонга ҳам 660 минг доза “Сovid-19” инфекциясига қарши “AstraZeneca” вакцинаси олиб келинган.

© namangan24.uz

--> -->